د کب په ۱۸ مه د ننګرهار ولایت د پوهنې ریاست او د التقوا، د لوړو زده کړو موسسې ترمینځ د همکارۍ هوکړه لیک لاسلیک شو
د پوهنې وزارت، ننګرهار: د دې هوکړه لیک له مخې به دواړه ادارې په علمي او زده کړییز ډګر کې یو له بل سره په ګډه همکاري کوي.
هغه غونډه چې په همدې موخه په یادې ادارې کې جوړه شوې وه، د پوهنې ریس حسیب الله شینواري، د التقوا د لوړو زده کړو موسسي څخه مننه وکړه چې د هېواد د ځوان نسل په روزنه کې تل زیار ګالي، نوموړي وویل: د لاسلیک شوي هوکړه لیک له مخې به د دواړو ادارو ترمینځ همغږي ډیره شي او همداراز د التقوا د لوړو زده کړو موسسې زدکړیالانو ته به د عملي زده کړو لپاره د پوهنې په چوکاټ کې زمینه برابره کړي.
وروسته د التقوا د لوړو زده کړو موسسې رئیس ډاکټر عبداللطیف مل شینواري خبرې وکړې او زیاته یې کړه، اړونده اداره به د دې هوکړه لیک له مخې د پوهنې ریاست څلویښت تنو کارکوونکو ته په پنځوس سلنه تخفیف د زده کړو زمینه برابره کړي او همدارنګه هغه نجونې زده کوونکې چې له دولسم ټولګي څخه په لومړۍ درجه فارغیږي، په یاد پوهنتون کې به په وړیا ډول لوړې زده کړې کوي، د دې ترڅنګ هغه هلکان زده کوونکي چې په لومړۍ درجه فارغیږي هغوی ته به د دې پوهنتون له لوري څلویښت سلنه تخفیف ورکول کیږي.
هیره دې نه وي چې د ننګرهار د پوهنې ریاست له دې وړاندې هم په یاد ښار کې له خراسان خصوصي پوهنتون سره د ګډې همکارۍ هوکړه لیک لاسلیک کړی و.
