د یو شمېر ولایتونو پوهنې کړنو ته کتنه
بادغیس
د بادغیس ولایت پوهنې ریاست د سواد زده کړې کمېټې غونډه، د یاد ولایت د مقام مرستیال مولوي غلام محمد محمدي په مشرۍ، د پوهنې، اطلاعاتو او فرهنګ، حج او اوقافو ریاستونو د استازو په ګډون جوړه او په ترڅ کې په تېرو کړنو او راتلونکو پلانونو خبرې وشوې.
نورستان
د نورستان ولایت پوهنې ریاست وایي: د پوهنې په برخه کې یو همکار بنسټ په مرکز او ولسوالیو کې د کتابونو او درسي موادو د وېش لړۍ بشپړه کړه.
بامیان
د باميانو ولايت د خصوصي ښوونځيو يو شمېر مسئولينو، د یاد ولايت له پوهنې رئيس قاري عنايت الله سهار سره وکتل.
په یاده کتنه کې دواړو لورو د خصوصي ښوونځيو د عمومي وضعيت په اړه خبرې وکړې او د هغوى ستونزې او وړانديزونه يې مطرح کړل.
ننګرهار
د ننګرهار ولايت پوهنې رئيس مفتي حبيب حضرت حقاني، د یاد ولايت د يو شمېر ښوونځيو له آزموینې بهیر څخه څارنه وکړه او له ښوونکو يې وغوښتل، چې د یادې پروسې روڼتیا ته جدي پاملرنه وکړي.
بلخ
د بلخ ولایت پوهنې ریاست د دیني مدارسو د ۷۳ خالي بستونو د ډکولو په موخه، له ۴۰۰ تنو نوماندانو څخه رقابتي آزموینه واخیسته.
