فاریاب ولایت کې د ۱۵ مېلیونه افغانیو په لګښت د یو لومړني ښوونځي جوړولو چارې بشپړې شوې
د فارياب ولايت پښتون کوټ ولسوالۍ اړوند په ګلیم باف های کلي کې د سيوک کريم لومړني ښوونځي چارې بشپړې او د يو لړ مراسمو په ترڅ کې چې پکې پوهنې رئيس الحاج مولوي محمد طاهر جواد، مسئولينو، مديرانو، استادانو، يو شمېر علماءکرامو او د خلکو استازو ګډون درلود، ګتې اخیستنې ته وسپارل شو.
د پوهنې رئیس وویل؛ د دغه لومړني ښوونځي په جوړولو ۱۵ مېلیونه افغانۍ لګښت راغلی او د جوړېدو په موخه یې ځمکه پخوا د ۳۲۵۰ متره مربع مساحت په لرلو سره د سیمې خلکو پوهنې ته وقف کړې وه.
سیمه ییزو خلکو د پوهنې له پروګرامونو د خپل ملاتړ د اعلانولو تر څنګ، په هېواد کې د ښوونیزو مرکزونو د پراختیا او رغونې په برخه کې د پوهنې وزارت له مشرتابه مننه وکړه.
