له ولایتونو د پوهنې لنډ خبرونه
لغمان
د پوهنې وزارت د ساینس مرکز اړوند د کارپوهانو یوې ډلې د لغمان ولايت له پوهنې رئیس سره تر لیدنې وروسته، د ياد ولایت د یو شمېر ښوونځیو ښوونکو ته د ساینسي موضوعاتو په اړه یو علمي او عملي سیمینار جوړ کړ او ګډون والو ته یې په دې برخه کې روزنه ورکړه.
کابل
د کابل ولایت په بېلابېلو ولسوالیو کې د سپمه يیزو زده کړو یو شمېر ټولګي بیا ورغول شول.
د ياد ولايت د پوهنې رياست مسئولين وايي: دغه ټولګي د پوهنې د يوې همکارې ادارې تر ملاتړ لاندې فعاليت کوي.
غور
د غور ولایت د امنیې قوماندانۍ د ۲۹ تنو امنیتي منسوبينو لپاره د سواد زده کړې کورس جوړ شو.
ياد کورس د غور امنيې قومندانۍ له لوري د پوهنې ریاست سره په همغږۍ جوړ شوی، چې د تدریس چارې يې د دغه قومندانۍ د یو تن چارواکي لخوا په داوطلبانه توګه پر مخ وړل کېږي.
پروان
د پروان ولایت د پوهنې ریاست د څارنې او ارزونې د عمومي مدیریت شپږ نوي ګمارل شوي مسلکي غړي د ياد ولایت د پوهنې رئیس مفتي محمد حسن حقاني لخوا د دې ادارې کارکوونکو ته ور وپېژندل شول.
هلمند
د هلمند ولایت د پوهنې ریاست له پاکستان څخه د ۱۴ راستنو شویو زده کوونکو څخه د سويې د تثبيت آزموینه واخیسته.
په پام کې ده، چې ياد زده کونکي د هغوی له سويې سره سم له اووم څخه تر دولسمو ټولګیو کې شامل شي.
