مېرمن رنګینه حمیدي د پوهنې وزارت د نوماندې او سرپرستې په حیث رسماً معرفي شوه او کار یې پیل کړ
د پوهنې وزارت_کابل: مېرمن رنګینه حمیدي د پوهنې وزارت د سرپرستې په حیث رسماً معرفي شوه او کار یې پیل کړ.
د اغلې رنګینې حمیدي د معرفۍ مراسم د جمهوري ریاست د چارو د ادارې د عمومي رییس ډاکټر فضل محمود فضلي، د پوهنې وزرات مخکیني وزیر ډاکټر محمد میرویس بلخي، د ملي شورا غړو، د پوهنې وزارت د معینانو او کارمندانو په ملتیا د پوهنې وزارت په مقر کې ترسره شو.
د جمهوري ریاست د چارو د ادارې عمومي رییس ډاکټر فضل محمود فضلي په دې مراسمو کې د پوهنې وزارت د پخواني مشرتابه د خدمتونو او زحمتونو په مننې سره ژمنه وکړه چې د جمهوري ریاست ماڼۍ په افغانستان کې د ښوونې او روزنې د وضعیت ښه کولو ته ژمنه ده او د پوهنې د اصلاحي پروګرامونو ننګه کوي.
په همدې حال کې، د پوهنې وزارت پخواني وزیر ډاکټر محمد میرویس بلخي د پوهنې وزارت له نوې سرپرستې مېرمنې رنګینې حمیدي څخه وغوښتل چې د پوهنې د اصلاحي پروګرامونو تداوم ته پام وکړي.
د پوهنې وزارت سرپرستې، مېرمنې رنګینې حمیدي، له جمهور رییس محمد اشرف غني څخه په مننې سره د پوهنې وزارت د پخواني مشرتابه زحمتونه وستایل او ویې ویل چې اصلاحات، د تعلیمي خدمتونو متوازن کول، د زده کړې د کیفیت لوړول، د تعلیمي نصاب معیاري کول، د ښوونکو د ظرفیت لوړول او د دې ادارې غیر سیاسي کول به یې د کار لومړیتوبونه وي.
اغلې حمیدي د پوهنې وزارت د رهبرۍ مسوولیت الهي امانت وباله او ټینګار یې وکړ چې د پوهنې له کورنۍ سره په همغږۍ سره به د افغانستان د بچیانو د راتلونکې د ښه کولو لپاره هلې ځلې کوي.
