ننګرهار کې د یو ښوونځي د جوړېدو چارې پیل شوې
د پوهنې وزارت_ننګرهار: د ننګرهار ولایت دهسکې مېنې ولسوالۍ پاپین د نجونو لېسې د نوې ودانۍ د بنسټ ډبره د یو لړ مراسمو په ترڅ کې د پوهنې رییس حسیب الله شینواری لخوا په داسي حال کې چې د یادې ولسوالۍ ولسوال رضوان الله بشرمل، قومی مشرانو، ښوونکو او زده کوونکو ګډون درلود کیښودل شوه.
د پوهنې رییس د ښوونځي د بنسټ ډبرې ایښودو په تړاو جوړو شویو مراسمو کې وویل، چې د دې ولایت د پوهنې ودې او پرمختګ ته جدي پاملرنه کوي او هڅې یې دا دي، چې د ښوونځي عمر لرونکو هېڅ ماشوم بې زده کړو پاتې نشي. نوموړي دغه راز له ټولو هغو کسانو مننه وکړه، چې په دې ولایت کې د پوهنې د ودې او پیاوړتیا لپاره کار کوي.
د پوهنې رییس په وینا د پاپین د نجونو د لیسې ودانۍ په پاخه او اساسي ډول د سویډن موسسې په مالي مرسته د ۳ میلیونو او ۱۳۲۹۸۰ زره افغانیو په مجموعی لګښت د ۸ میاشتو په موده کې جوړیږی، چې ۸ درسي ټولګې، ۲ د لابراتوار خونې، ۲ اداري خونې، د څښاک اوبو ژوره څاه، پېنځه غرفې معیاري تشنابونه او نور اړین ملحقات به ولري چې د ښوونځي د نوې ودانۍ له جوړېدو او پرانېستو سره به د یادې سیمې سلګونو نجونو زده کوونکو ته د زده کړو خوندي درسي چاپېریال برابر شي.
