نورستان ولایت ته د پوهنې وزارت سرپرست د سفر لنډ راپور:
![شسیبل](/sites/default/files/2023-06/whatsapp_image_2023-06-26_at_12.17.08_pm.jpeg)
د پوهنې سرپرست الحاج مولوي حبیب الله آغا او ورسره مل پلاوي د پوهنې د رهبرۍ د ولایتي سفرونو په لړ کې په دې وروستیو کې د یادو ولایتونو د تعلیمي او تحصیلي وضعیت د څېړلو په موخه نورستان ولایت ته سفر وکړ.
په پیل کې یې د دغه ولایت د پوهنې ریاست څخه لیدنه وکړه، د ریاست له رئیس، مشرتابه غړو او کارکوونکو سره یې وکتل او د یاد ولایت د پوهنې د پرمختګ او ننګونو په اړه یې مفصلې خبرې او نظرونه تبادله کړل.
د غونډې په پیل کې د نورستان ولایت د پوهنې رئیس مولوي تاج محمد مطمئن د دغه ولایت د پوهنې سرپرست ته ښه راغلاست ووایه او د یاد ولایت ښوونیز وضعیت ته یې د پوهنې وزارت له پاملرنې مننه وکړه.
وروسته نوموړي د ترسره شویو کارونو او فعالیتونو په اړه لنډ راپور وړاندې کړ، د پوهنې ریاست د پروګرامونو د پرمختګ په برخه کې یو شمېر ستونزې هم له اداري پلاوي سره شریکې کړې.
ورپسې د پوهنې وزارت سرپرست په هغه لویه غونډه کې چې د پوهنې رياست او مشرتابه په ګډون جوړه شوې وه، د نورو ادارو مسئولینو، استادانو، ښوونکو، زده کوونکو، علماوو او قومي مخورو هم پکې ګډون کړی وو ، د پوهنې وزارت د پروګرامونو او د دغه ولایت د ښوونیز وضعیت د ښه والي په اړه يې خبرې وکړې او له دوی څخه یې د پوهنې په برخه کې د مرستې غوښتنه وکړه.
د سفر په ترڅ کې د پوهنې سرپرست وزیر او ورسره مل پلاوی د هغه ولایت ونډ پایګل ولسوالۍ ته ولاړ او هلته یې د دارالعلوم روضې څخه د لیدنې پر مهال د دارالعلوم له استادانو، علماوو، قومي مشرانو او د دې ولسوالۍ د خلکو له استازو سره وکتل او له هغوی سره يې د ښوونې او روزني په برخه کې د پرمختګ او لاښه والي په اړه خبرې وکړې. او د يادې ولسوالۍ له مشرانو يې وغوښتل چې خپل ماشومان ديني ښوونځیو او مدارسو ته واستوي.
همدارنګه د کونړ ولايت د چپې درې او څوکۍ سرحدي ولسوالۍ چې د نورستان ولايت په ګاونډ کې پرتې دي او د يادو ولسواليو د پوهنې مسئولين هم حاضر وو، نوموړي يادو ولسواليو ته د سفر تر څنګ د يادو ولسواليو له ښوونيزو او روزنيزو بنسټونو څخه ليدنه او د يادو سيمو له مسئولینو او استادانو سره يې خبرې او غونډه وکړه.
د نورستان ولايت له ښوونځيو، مسئولينو او خلکو سره د پوهنې وزارت سرپرست د ليدنو کتنو په پايله کې ټولو دغه ولايت ته د ياد وزارت د پلاوي له سفر څخه خوښي څرګنده کړه او د وزارت د پلانونو د تطبيق په برخه کې يې د هغوى د ملاتړ ډاډ ورکړ او په نورستان ولایت کې يې د پوهنې وزارت د پلانونو په تطبيق ټینګار وکړ.