په لوګر ولایت کې د۷ بابه ښوونځيو بنسټ ډبرې کېښودل شوې
په هغه مراسمو کې چې د پوهنې وزارت د مقام د دفتر لوی رئیس الحاج مولوي شهاب الدین ثاقب سربېره دیاد ولایت پوهنې رئیس الحاج مولوي عبدالرحمن حمیدي، د علماوو شورا رئیس او د یاد ولایت د سیمه ییزو ارګانونو یو شمېر مسئولینو حضور درلود؛ په ترڅ کې یې د ۷ بابه ښوونځيو د بنسټ ډبرې کېښودل شوې.
د لوګر ولايت د پوهنې ریاست د مسئولينو په وينا: ياد ښوونځي د پوهنې په برخه کې د يو همکار بنسټ له خوا جوړېږي، چې ۴ بابه يې په خروار، ۲ بابه یې په بره کي برک او يو باب یې په څرخ ولسوالیو کې ، چې ٥٠ مېليونه افغانۍ لګښت پرې راځي.
د يادونې وړ ده، د دغه هر یو ښوونځي ودانۍ ۶ درسي ټولګي، يوه اداري خونه لري، چې د شپږو مياشتو په موده کې به یې د جوړولو چارې بشپړې شي او شاوخوا ۷۰۰۰ تنو زده کوونکو ته به د زده کړو خوندي چاپېریال برابر شي.
د لوګر ولایت ولسونو د هېواد بچیانو د زده کړې په برخه کې د پوهنې وزارت د مشرتابه هڅې وستایلې.
