په هرات ولایت کې د ۲۵ بابه ښوونیزو بنسټونو د بیارغونې چارې د ۲۰ مېلیونه او ۱۶۴ زره افغانیو په لګښت سره پیل شوې
د پوهنې وزارت د چارواکو په وینا، د یاد وزارت له بودیجې څخه د هرات ولایت په مرکز او ولسوالیو کې، د ۲۰ مېلیونه او ۱۶۴ زره افغانیو په ارزښت د ۲۵ بابه تعلیمي مرکزونو د ترمیم او بیارغونې چارې پیل شوې.
د هرات پوهنې رئيس مولوي رحمت الله جابر د یادو پروژو د عملي چارو د پيل په ترڅ کې وويل، چې دغه پروژې د پوهنیزو بنسټونو د بیارغونې او زده کوونکو په ځانګړي ډول د لرې پرتو او محرومو سيمو د زده کوونکو لپاره د مناسب ښوونیز چاپېريال د برابرولو په موخه پلې کېږي.
نوموړي زياته کړه: په یادو پروژو کې د مدارسو او ښوونځيو اساسي ترميمول، د درسي ټولګيو بيارغونه او د نورو اړینو آسانتياوو برابرول شامل دي.
