په پوهنې وزارت کې د نويو تشکیلاتي اصلاحاتو په اړه مطبوعاتي اعلامیه
د پوهنې وزارت، کابل: څرنګه چې زموږ ګران هیوادوال خبر دي څو ورځې وړاندې د جمهوري ریاست د مقام د حکم له لارې د تشکیلاتو د کره توب، د اداراتو د موثریت او ودې په موخه د پوهنې وزارت اصلاحي تشکیلات منظور شول.
د پوهنې وزارت دغه اقدام؛ په تیره د اسلامي زده کړو د معینیت په اړه په عامه اذهانو کې ځینې پوښتنې را پورته کړې دي چې په هیواد کې د اسلامي زده کړو د ودې په اړه د هغوی لوړ تعهد او احساس څرګندوي.
د پوهنې وزارت د دې هیواوالو پاکو احساساتو ته په درنښت اړینه بولي تر څو د دوی اندیښنو او پوښتنو ته توضیحات ورکړي چې: داسلامي زده کړو معینیت چې تر مشرۍ لاندې یې دارالعلومونه، دارالحفاظونه او دیني مدرسې فعالیت کوي، د پوهنې وزارت د جوړښت څخه نه ایستل شوی، نه مدغم شوی او نه هم په حج او اوقافو وزارت پورې تړل شوی دی؛ بلکې دا تشه ډنډوره ده، چې دغه موضوع پرون د یوه مطبوعاتي کنفرانس له لارې د پوهنې وزارت د سرپرستې وزیرې له خوا شریکه شوه.
د پوهنې وزارت مشرتابه ټولو هیوادوالو ته ډاډ ورکوي؛ چې په تشکیلاتو کې اصلاحي بدلونونه کومه سیاسي موخه نه لري، بلکې د یوه دیني او هیوادنۍ مینې له کبله ترسره شوي. چې د خپلو مرکزي تشکیلاتو په راټولولو سره د پوهنې متوازنه پراختیا، خدماتو وړاندې کول او په ټولو ښوونیزو بنسټونو کې د سرچینو عادلانه وېش تضمینوي او زموږ هیوادوال به د هیواد په ښوونیز نظام کې د پراخو، موثرو او واحدو کړنلارو پر بنسټ د سترو لاسته راوړنو شاهدان وي.
