پکتیکا ولایت کې د ۲۴ مېلیونه افغانیو په لګښت د ۴بابه ښوونځیو لپاره ودانۍ جوړېږي
د پکتیکا ولایت ورمې او تروې په سرحدي ولسوالیو کې د ملي بودیجې څخه د ۲۴ مېلیونه افغانیو په لګښت، د ۴ بابه ښوونځیو د ودانیو بنسټ ډبره د یاد ولایت د والي مولوي عبدالخالق عابد، پوهنې رئیس مولوي عبدالوکیل خالد، منسوبینو او علماءکرامو په حضور کې کېښودل شوه.
په یادو مراسمو کې چې په جلا جلا توګه ترسره شول،مسئولينو د دغو تاسيساتو د جوړولو په ارزښت خبرې وکړې او له سيمه ييزو خلکو يې وغوښتل، چې د پوهنیز نظام لاپراختيا په برخه کې له پوهنې وزارت سره د همکاریو ترڅنګ، د یاد وزارت له پلانونو او پروګرامونو څخه هراړخیز ملاتړ وکړي.
ورپسې علماءکرامو او قومي مخورو هم په خپلو خبرو کې د يادو ښوونيزو مرکزونو په جوړېدو خوښي وښوده او د پوهنې وزارت څخه يې مننه وکړه، چې په سرحدي ولايتونو کې يې د زده کوونکو ستونزې هوارې کړې.
دغه راز هغوی د پوهنې مسئولینو سره ژمنه وکړه، چې د ښوونې او روزنې د مرکزونو د ساتنې او مراقبت په برخه کې به جدي پاملرنه وکړي.
