په ننگرهار ولایت کې د ښوونځيو د سمبالولو لپاره عامه مرسته
د پوهنې وزارت، ننګرهار: د ننګرهار ولایت د خوږیاڼیو ولسوالي یو قومي مشر او معارف پاله شخصیت دیادې ولسوالۍ له یو ښوونځي سره مرسته وکړه.
د ننګرهار ولایت دولایتي شورا پخواني غړي او د خوږیاڼیو ولسوالۍ قومي مخور او معارف پاله شخصیت حاجي محمد حسن د پوهنې ریاست په هڅونه د یادې ولسوالۍ وزیرو جهادي لېسې لپاره په خپل شخصي لګښت د څلورو عصري تشنابونو د جوړولو چارې پېل کړې همدارنګه یې د همدې لېسې د څښاک د پاکو اوبو د ژورې څاه لپاره د پلاستیکي پایپ او لمریزې بریښنا هندارو او دغه راز د وزیر نسوانو لېسې سره هم لمریزې بریښنا د هندارو مرسته وکړه.
نوموړي تر دې وړاندې هم د خوږیاڼیو ولسوالۍ له یو شمیر ښونځيو سره د اړتیا وړ توکو مرسته کړې وه.
پوهنې ریاست د دغه معارف پاله شخصیت له وړ او پر ځای مرستو څخه مننه کوي او پر نورو شتمنو او معارف پاله شخصیتونو هم د ورته مرستو د ترسره کولو غږ کوي.
