د پروان ولایت د غوربند ولسوالۍ د پوهنې آمریت ودانۍ پرانیستل شوه
د پوهنې وزارت، پروان: د پروان ولایت د غوربند سیاګرولسوالۍ د پوهنې آمریت نوې ودانۍ د نوموړي ولایت د والي ډګر جنرال فضل الدین عیار او د پوهنې رییس عبدالظهور حکیم لخوا په داسی حال کې چې د دولتی ادارو یو شمیر مسوولینو، د ولایتي شورا غړو او د سیمې قومی مشرانو ګډون درلود د پټي په پریکولو سره پرانیستل شوه.
نوموړي ودانۍ په پاخه واساسي ډول په دوه پوړنو کې د ښار جوړولو او ځمکو وزارت لخوا د ۱۱ میلیونو افغانیو په مجموعي لګښت جوړ شوی، چي ۷ اداري خونې او نور اړینې آسانتیاوي لري.
د ودانۍ د پرانستې په مراسمو کې، د دغه ولایت والي تورنجنرال فضل الدین عیار د پوهنې آمریت کارکوونکو او د سیمې اوسیدونکو ته د ودانۍ د جوړیدو له امله مبارکي وویله او د ټولو قومونو ترمنځ يې پر یووالي ټینګار وکړ او ژمنه یې وکړه چې خلکو ته به د ښوونې او روزنې په برخه کې ښه خدمات وړاندې کوي.
د پروان ولایت د پوهنې رییس عبدالظهور حکیم د یاد آمریت کارکوونکو ته د نوې ودانۍ جوړیدو له امله مبارکي وویله او زیاته یې کړه چې د غوره خدمتونو وړاندې کول یې د پوهنې ریاست له لومړیتوبونو څخه دي او مراجعینو ته د مساوي خدماتو په وړاندې کولو ټینګار وکړ.
د پروان ولایت د پوهنې رییس د دې آمریت له کارکوونکو وغوښتل چې د دې ودانۍ ساتنې او څارنې ته جدي پاملرنه وکړي.
