غور ولایت کې د پوهنې ریاست چارواکو او مرستندویه موسسو ترمینځ د همغږۍ ناسته ترسره شوه
پوهنې وزارت، غور: د غور ولایت د پوهنی ریاست چارواکو او مرستندویه موسسو ترمینځ د همغږۍ غونډه د یاد ولایت د پوهنې ریاست د غونډو په تالار کې جوړه شوه.
په نوموړې غونډه کې د کلیو د بیارغونې او پراختیا ، د کډوالو او راستنیدونکو چارو د ریاستونو استازو، د یونیسف ، سي آر ایس او ورډ ویژن مرستندویه موسسو چارواکو ګډون درلود.
د غور د پوهنې سرپرست میراحمد حسیني د مرستندویه موسسو له همکارۍ نه د مننې تر څنګ د دې ادارې ستونزې او ننګونې په ګوته کړې او ویل: د ښوونځیو ودانۍ او د مسلکي ښوونکو نشتون هغه ننګونې دي چې موږ ورسره مخ یو، چې د دې ستونزو د حل لپاره موږ د مرستندویه موسسو لا ډیر ملاتړ او مرستو ته اړتیا لرو.
د یاد ولایت د پوهنې سرپرست د سیمه ییزو ښوونځیو له لارې ښوونې او روزنې ته د خلکو د لاس رسي او همداراز د پوهنې د کیفیت د لوړو په موخه، د مرستندویه موسسو پر دوامداره مرستو ټینګار وکړ.
په دې ناسته کې د مرستندویه موسسو او دولتي ادارو استازو وویل: موږ د تل په څیر د پوهنې ملاتړ کوو او په دې برخه کې شته ستونزې او ننګونې به له خپلو اړونده ادارو سره شریکې کړو او د حل لپاره به یې هراړخیزې هلې ځلې هم وکړو.
