د خصوصي ښوونځيو، مدرسو او دارلعلومونو د ثبت او راجستر په تړاو د پوهنې وزارت خبرتيا
څرنګه چې څرګنده ده، د ښوونيزو بنسټونو د چارو په اجرا کې د آسانتياوو برابرول د پوهنې وزارت له لومړيتوبونو څخه دى.
يادې موخې ته رسيدو او د خصوصي سکتور د لا هڅونې په پار، پوهنې وزارت د آنلاين سيسټم له لارې د خصوصي ښوونيزو بنسټونو د ثبت او راجستر لړۍ پيل کړې ده، چې دغه چاره له يوه اړخه د کار د سرعت لامل ګرځي او له بل پلوه پروسه په شفاف ډول ترسره کيږي، ترڅو خصوصي سکتور وکولاى شي خپلې ښوونيزې او روزنيزې چارې په ښه توګه ترسره کړي.
د کابل ښار پوهنې رياست مکلف دى، چې ټولو خصوصي ښوونيزو بنسټونو (ښوونځيو، مدرسو او دارلعلومونو) چارواکو ته خبر ورکړي، چې ياد بنسټونه دې په لاندې ويبپاڼه کې په آنلاين ډول ثبت او راجستر کړي.
هيره دې نه وي، چې د آنلاين راجستر لارښود په يادې ويبپاڼې کې شته او د راجستر موده يوه مياشت ده.
هغه ادارې چې د يوې مياشتې په اوږدو کې خپل راجستر تکميل نه شي کړاى د خصوصي تعليماتو رياست لخوا به جدي سپارښتنې ورته و شي.
