د پوهنې وزارت د اسلامي تعلیماتو معین د یاد وزارت مسئولینو او کارمندانو ته ور وپېژندل شو
د پوهنې وزارت د اسلامي تعلیماتو معین الحاج مولوي کرامت الله اخندزاده د یاد وزارت د سرپرست وزیر شیخ القرآن والحدیث الحاج مولوي نورالله منیر او د اسلامي امارت د چارو د ادارې د لوی ریاست د مرستیال الحاج مولوي سیف الدین تائب له لوري د پوهنې وزارت مسئولینو او کارمندانو ته رسما ور معرفي شو.
هغه مراسم چې په همدې مناسبت د پوهنې وزارت د غونډو په تالار کې جوړ شوي وو، د یاد وزارت سرپرست وزیر شیخ القرآن والحدیث الحاج مولوي نورالله منیر، د سرچینو او ادارې معین شیخ الحدیث و التفسیر خلیفه حافظ مولوي سعیداحمد شهیدخیل او د چارو د ادارې د لوی ریاست مرستیال الحاج مولوي سیف الدین تائب پکې ویناوې وکړې.
ټولو ویناوالو محترم اخندزداه صاحب ته د نوې دنده مبارکه وویله او د الله تعالی له دربار څخه یې ورته د توفیق غوښتنه وکړه. وروسته د نوموړي لنډ ژوند لیک د یاد وزارت د نشراتو او عامه اړیکو د رئیس عزیزاحمد ریان له لوري ولوستل شو.
د غونډې په پای کې په خپله مولوي کرامت الله اخندزاده صاحب هم لنډه وینا وکړه. نوموړي دخپلې وینا په ترڅ کې داسلامي امارت د مشرتابه له اعتماد څخه مننه وکړه، دپوهنې وزارت له ټولو مسئولینو او کارمندانو څخه یې د یاد مسئولیت د اداء کولو په برخه کې د مرستې غوښتنه وکړه او n راتلونکي لپاره یې د اسلامي تعلیماتو د اړوندو تعلیمي مراکزو د کمیت او کیفیت لوري ته د پوره توجه ژمنه وکړه .
غونډه د یاد وزارت د دعوت او ارشاد ریاست د رئیس مولوي عبدالحی حازم صاحب له لوري د دعائیې په لوستلو سره پای ته ورسیده .
