د EPDموسسې له لوري د پکتیا پوهنې ریاست سره د همکارۍ تړون لاسلیک شو
د پکتیا پوهنې ریاست او EPD مؤسسې تر منځ د څه باندی ۲۱۷ زرو ډالرو په ارزښت د همکارۍ تړون لاسلیک شو.
تړون د پوهنې رئیس استاد کوچي ځاځي او د یادې مؤسسې د مسؤلې زرمینې افضلي تر منځ لاسلیک شو. ددې تړون له مخې به یاده مؤسسه د دوه کلونو لپاره د پوهنې ریاست او ولس سره د ظرفیت لوړونې په برخه کې همکاري کوي،چې د ښوونځيو او بیلا بیلو ولسوالیو شوراګانې، مدني ټولنې او د DDA شورا پکې ګډون لري.
دپکتیا د پوهنې رییس استاد کوچي ځاځي د یاد تړون د لاسلیک پر مهال یادونه وکړه، په ټوله کې ددې تړون هدف دا دی چې څنګه یادې شوراګانې او ولس له معارف څخه نظارت وکړي، چې ښو خدمتونو ته لاره هواره شي. ددې تر څنګ به یاد تړون هدف دا وي چې ولس له پوهنې سره لاس په لاس همکار ووسي.
د یادولو وړ ده، چې په بیلابیلو ولسوالیو کې لا له وړاندې ۴۲ کسیزې شوراګانې هم ترتیب شوې چې میرمنې هم په کې ګډون لري.
د پوهنې رئیس استاد کوچي ځاځي وویل: مونږ ددې مؤسسې له مشرتابه منندوی یو چې له مونږ سره د پوهنې په بیلا بیلو برخو کې همکاري کوي، او له نورو همکارو مؤسسو مو هم هیله ده چې له مونږ سره د پوهنې په برخه کې خپله همکاري ونه سپموي.
