د ولایتونو له ښوونیزو فعالیتونو څخه د ځینو خبرونو لنډیز
پکتيکا
د پوهنې وزارت د داخلي پلټنې پلاوي په ۱۴۰۱ لمریز کال کې د پوهنې ریاست د فعالیتونو څېړنې په موخه، پکتیکا ته سفر وکړ او د یاد ولایت پوهنې له رئیس او مشرتابه سره یې د لیدنې پر مهال، په دې برخه کې د همکارۍ غوښتنه وکړه.
پکتیا
د پکتيا ولايت پوهنې رئيس مولوي عبدالوکيل خالد د یاد ولايت پوهنې رياست له آمرینو او مدېرانو سره وکتل او د پوهنې د ستونزو د حل په اړه يې له هغوی سره خبرې او نظرونه تبادله کړل.
نوموړي د پوهنې عمومي وضعيت وڅېړه او له اړوندو مسئولينو يې وغوښتل، چې د ياد ولايت د پوهنې وضعيت د ښه والي په برخه کې صادقانه ګامونه پورته کړي.
پروان
د پروان ولایت پوهنې رئیس مفتي محمد حسن حقاني او ورسره مل پلاوي، د سرخ پارساه ولسوالۍ له پوهنې مسئولینو سره وکتل او د یادې ولسوالۍ بازار ته یې د پوهنې آمریت د دفتر د انتقال په اړه له مسئولینو سره خبرې وکړې. د یو بل خبر له مخې:
د پروان ولایت پوهنې رئیس د سرخ پارساه ولسوالۍ د نسوان سرخ، فاطمه الزهرا، ابوبکر صدیق (رضي الله عنه)، خواجه پارسا ولیعهد او عبدالرؤف حجت دارالعلوم اداري او تدریسي چارې وڅېړلې.
بغلان
د (خپلواکۍ کپ) تر نامه لاندې د بغلان ولايت پوهنې رياست د ښاري ناحیې اړوندو، ۸ ښوونځيو د کرېکټ لوبې سيالۍ، د پلخمري ښار د عالي لېسو د ۸ لوبډلو په ګډون، د یاد ولایت د پوهنې ریاست له لوري په رسمي ډول د پټۍ په پرېکولو سره پرانیستل شوې.
