د ولایتونو له پوهنې ډګره څو لنډ خبرونه
هرات
د پسران خوافي خیریه بنسټ، د هرات د مرکز او ولسوالیو د ښوونځیو پر اړمنو زده کوونکو د مرستو د ویش لړۍ پیل کړه.
ويل کيږي، چې د یاد بنسټ له لوري د مرکز اړوند ښوونځيو په ١٠٠٠ تنو زده کوونکي بکسونه او درسي توکي وېشل شوي دي.
کندوز
د کندوز ولایت پوهنې ریاست د یاد ولایت د خان آباد ولسوالۍ د پوهنې آمریت اړوند، د ښوونکو د ۸۰ خالي بستونو د ډکولو په موخه، له نوماندانو څخه آزموینه واخیسته.
په پام کې ده، چې د یادې پروسې بریالي نوماندان به د ښوونکو په توګه وګمارل شي.
بامیان
دبامیان ولایت د پوهنې رئیس الحاج مولوي رحمت الله قندیلي په مشرۍ د همغږۍ غونډه، د پوهنې د مسئوولینو او همکارو ادارو د استازو په حضور کې جوړه شوه.
غزني
د غزني ولایت پوهنې ریاست د یاد ولایت د رشیدانو، خوګیاڼو، آب بند او ده یک ولسوالیو پوهنې آمریتونو ته، د ښوونکو او زده کوونکو لپاره د درسي توکو او کتابونو ۵۵۴ بستې ښوونیز مواد ولېږل.
د پوهنې ریاست چارواکو له اړوند مسئولینو وغوښتل، تر څو یاد توکي په منظم ډول د دغه ولسوالیو په ښوونکو او زده کوونکو ووېشي.
بغلان
د پوهنې په برخه کې یو همکار بنسټ د بغلان ولایت له پوهنې ریاست سره په همغږۍ، د سیمه ییزو او چټکو زده کړو د ۱۶۰ تنو ښوونکو لپاره یو میتودیک سیمینار جوړ کړ.
په یاد سیمینار کې روزونکو ګډون والو ته د ښوونې او روزنې اغېزمن مېتودونه او ځینې مهم اداري او تدریسي مسایل وروښودل.
