په غزني ولایت کې د یو باب دیني مدرسې د بنسټ ډبره کېښودل شوه
د غزني ولايت مقر ولسوالۍ اړوند د خداى نظر چمبر په سيمه کې د "شمس العلوم" ديني مدرسې د بنسټ ډبره، د پوهنې رياست د مشرتابه، ديني علماوو او د سيمې د خلکو په ګډون د يو لړ مراسمو په ترڅ کې کېښودل شوه.
د یادې مدرسې د جوړېدو لپاره ۱،۵ میلیونه افغانۍ ځانګړې شوې، چې د مقر ولسوالۍ د اوسېدونکو له خوا ورکول کېږي.
ټاکل شوې، چې د یادې مدرسې ودانۍ په ۲ جرېبه ځمکه کې د ۶ درسي ټولګيو، یوې اداري خونې او یو شمېر نورو اړینو ملحقاتو په لرلو سره جوړه شي.
د پوهنې وزارت مشرتابه د پوهنې په برخه کې د خلکو، په ځانګړې توګه د غزني ولایت د خدای نظر چمبر کلي له خلکو څخه مننه وکړه او دا یې یو صدقه جاریه عمل وباله.
د غزني ولايت پوهنې مسئولين وايي، چې د یادې ودانۍ په جوړېدو سره به د دغې سيمې شاوخوا ۲۵۰ تنو ماشومانو ته د زده کړې خوندي چاپېریال برابر شي.
