په غزني ولایت کې د یو لومړني ښوونځي د ودانۍ بنسټ ډبره کېښودل شوه
د غزني ولایت پوهنې رئیس الحاج مولوي میر نصیر احمد حسیني، په داسې حال کې چې د پوهنې مسئولینو، د سیمې یو شمېر علماوو او قومي مخورو هم حضور درلود، د یاد ولایت جغتو ولسوالۍ په شاکي کلي کې د شاکي لومړني ښوونځي د ودانۍ بنسټ ډبره کېښودله.
د نوموړي په وينا، په پلان کې ده، چې د ښوونځي دغه ودانۍ د سیمه ییزو خلکو په ملاتړ د ۷ مېليونه افغانيو په لګښت سره، د ٨ درسي ټولګيو، يوې اداري خونې او ټولو اړینو آسانتیاوو په درلودلو سره ورغول شي.
د پوهنې وزارت مشرتابه د غزني ولایت جغتو ولسوالۍ د علم پروره ولسونو له مرستو څخه مننه او قدرداني کوي.
