په کندوز ولایت کې د "استاد عبدالله" منځني ښوونځي نوې ودانۍ پرانیستل شوه
د کندوز ولایت مرکز اړوند «د استاد عبدالله منځني ښوونځي» نوې ودانۍ د یو لړ مراسمو په ترڅ کې، چې پکې د یاد ولایت پوهنې رئیس مولوي حزب الله مبشر، استادانو او یو شمېر قومي مخورو ګډون درلود، ګټې اخیستنې ته وسپارل شوه.
د ښوونځي د دغې نوې ودانۍ په جوړولو ۱۶ مېليونه او ۵۰۰ زره افغانۍ لګښت راغلی، چې د پوهنې د یو ملاتړ بنسټ لخوا ورکړل شوي دي.
یاد ښوونځی ۸ درسي ټولګي، دوه اداري خونې له ټولو اړینو آسانتیاوو سره لري.
د کندوز پوهنې رئيس په خپلو خبرو کې له خلکو وغوښتل، تر څو خپل ماشومان مدارسو او ښوونځيو ته واستوي او زده کوونکو ته يې سپارښتنه وکړه، چې د ښوونځي د وسايلو ساتنې ته جدي پاملرنه وکړي.
