د پوهنې وزارت سرپرست په کونړ ولایت کې د یو ښوونځي د ودانۍ بنسټ ډبره کېښوده
د پوهنې وزارت سرپرست الحاج مولوي حبیب الله آغا په داسې حال کې، چې د عامې روغتیا، مخابراتو وزیرانو، د کونړ والي، علماوو او د سیمه ییزو ادارو یو شمېر مسئولینو او د یاد ولایت د خلکو استازو حضور درلود، د کونړ ولایت په مرکز اړوند ساګي سیمه کې د یو باب لېسې د ودانۍ بنسټ ډبره کېښوده.
د پوهنې د مسئولینو په وینا، د دغه ښوونځي پر جوړېدو به شاخوا ۱۸ مېلیونه افغانۍ لګښت راشي، چې د پوهنې په برخه کې د یو همکار بنسټ له خوا ورکول کېږي.
د پوهنې وزارت سرپرست د يادې لېسې د بنسټ په مراسمو کې وويل: د دغه وزارت له مهمو پروګرامونو څخه يو هم د هېواد په لرو پرتو او محرومو سيمو کې د هېواد بچیانو لپاره د زده کړو د آسانتياوو برابرول دي.
د يادونې وړ ده، همدغه لېسه په دوو پوړونو کې جوړېږي، چې د اړينو ملحقاتو تر څنګ به ١٤ درسي خونې ولري.
د دغه ښوونځي په جوړېدو سره به ۴۰۰ تنو ماشومانو ته د زده کړو زمینه برابره شي.
