د پوهنې وزارت د اسلامي زده کړو معین تخار او بدخشان ولایتونو ته رسمي سفر وکړ
د پوهنې وزارت د اسلامي زده کړو د معین الحاج مولوي کرامت الله آخندزاده په مشرۍ یوپلاوی تخار او بدخشان ولایتونو ته ورسېد.
په پیل کې نوموړی تخار ولایت ته ولاړ او هلته یې د یاد ولایت له پوهنې رئیس الحاج مولوي محمد اسماعیل ابو احمد، پوهنې مسئولینو او علماوو سره په کتنه کې، د دغه پلاوي د سفر اساسي موخه، د مدرسینو د مسلکي پراختیا اړوندو بستونو عادلانه وېش او استخدام، کلیوالي مدارسو ته پاملرنه، د دولتي او خصوصي ښوونځيو د ستونزو ارزونه او حل وبلله.
ورپسې د پوهنې وزارت د اسلامي زده کړو معین او ورسره پلاوی بدخشان ولایت ته ولاړ.
نوموړي د بدخشان ولایت له پوهنې رئیس الحاج مولوي نصرت الله فیضاني او مسئولینو سره په کتنه کې د خپل سفر د موخو د تشرېح په ترڅ کې وویل:
بدخشان ولايت د هېواد له محرومو ولايتونو څخه دی او د ديني او عصري علومو په برخه کې یې د ښوونيزو خدمتونو پر پياوړتيا ټينګار وکړ.
د دواړو ولایتونو د پوهنې رئیسانو په خپلو ولایتونو کې ورغلي پلاوي ته د ښه راغلاست په ترڅ کې د پوهنې وزارت د اسلامي زده کړو له معین څخه وغوښتل چې د مدارسو جوړولو، د زده کوونکو د اعاشې په برخه کې د پاملرنې، د دیني زده کړو بنسټونو، د ښوونځیو د ښوونکو د بستونو زیاتوالي او نورو برخو کې همکاري وکړي.
