د پوهنې وزارت د دارالعلومونو رئیس د تخار ولایت له یو شمېر دیني بنسټونو څخه لیدنه وکړه
د پوهنې وزارت د دارالعلومونو رئیس مولوي عبدالقدوس قدوسي چې د تخار ولایت د دارالعلومونو ارزونې په موخه د یو پلاوي مشري کوي، د دغه ولایت د دارالعلومونو له مسئولینو او استادانو سره وکتل.
په یاده کتنه کې نوموړي د استادانو د تدریس پر کیفیت د ټینګار ترڅنګ ډاډ ورکړ چې د پوهنې وزارت مشرتابه په هېواد کې د تحصیلي بنسټونو پراختیا او پرمختګ ته جدي پاملرنه کوي او له مسئولینو یې وغوښتل چې د هېواد بچیانو د ښوونې او روزنې په برخه کې له پوره اخلاص او دقت څخه کار واخلي.
له بلې خوا د تخار د دارالعلومونو مسئولینو هم ورغلي پلاوي ته د ښه راغلاست پرمهال د پوهنې د بډاینې په برخه کې د پوهنې وزارت د رهبرۍ له پاملرنې مننه وکړه.
د پوهنې وزارت د دارالعلومونو رئیس ژمنه وکړه، چې د ټولو پوهنیزو مرکزونو د ستونزو په حل کې به همکاري کوي.
