پکتیا ولایت کې د څه باندې ۱۰ مېلیونه افغانیو په لګښت د ښوونیزو مرکزونو د بیارغونې ۱۷ پروژې پرانیستل شوې
د پکتیا ولایت په ۱۲ولسوالیو کې د ۱۵ بابه ښوونځیو او ۲ بابه مدارسو بیارغونې چارې، چې درې میاشتې وړاندې د پوهنې وزارت له بودیجې څخه څه د پاسه ۱۰ مېلیونه افغانیو په لګښت پیل شوې وې، اوسمهال بشپړې او د یوې غونډې په ترڅ کې چې د پوهنې ریاست مسئولینو، سیمه ییزو چارواکو، مشرانو او د دغه ولایت د خلکو استازو پکې حضور درلود، په رسمي ډول ګټې اخیستنې ته وسپارل شوې.
د پکتيا پوهنې رئيس مولوي عبدالقيوم فاروقي د ديني او عصري زده کړو د ارزښت په اړه د وينا پر مهال څرګنده کړه، چې ښې او باکيفيته زده کړې يو مناسب تعليمي چاپېريال ته اړتيا لري او د پوهنې وزارت هڅه کوي، تر څو د مناسبو تعلیمي تاسیساتو د جوړولو او ترمیم سربیره د ماشومانو لپاره هر ډول لازمې ښوونیزې او روزنیزې آسانتياوې برابرې کړي.
په پاى کې مشرانو او د خلکو استازو هم په دغه ولايت کې د ښوونيزو مرکزونو د بيا جوړولو له امله خوښي څرګنده او په دې برخه کې يې د پوهنې وزارت له کړنو مننه وکړه.
