په کابل ښار کې د امام محمد بن حسن الشیباني دیني مدرسه پرانیستل شوه
پوهنې وزارت، د کابل ښار پینځمه ناحیه کې د امام محمد بن حسن الشیباني مدرسه، د ځوان نسل د روحیې د پیاوړتیا او د دیني او عصري زده کړو ترمنځ د واټن کمولو په موخه پرانیستله او تمه ده چې د لیسې دورې (د لسم، یوولسم او دولسمو ټولګيو) زده کوونکي د خپلو ښوونځيو د مضامینو سربېره په یاده مدرسه کې دیني زده کړې هم تر لاسه کړي.
د یادونې وړ ده، چې دغه تعلیمي مرکز د پوهنې وزارت د سرچینو او ادارې د معین الحاج مولوي صبغت الله وصیل، د آزموینو ملي ادارې لوی رئیس شیخ عبدالباقي حقاني، د پوهنې وزارت د مرکزي څانګو د ځینو رئیسانو او مسئولینو په حضور کې پرانیستل شو.
ویناوالو په خپلو خبرو کې د عصري علومو تر څنګ د دیني علومو مطالعه خورا ګټوره او مهمه وبلله او د هېواد له زده کونکو او ښوونکو یې وغوښتل چې د همدغو دوو پوهنیزو څانګو ترمنځ د واټن له منځه وړلو لپاره زیاتې هلې ځلې وکړي.
