د پوهنې محترم وزیر لخوا په میدان وردګ ولایت کې د ۹.۵ مېلیونه افغانیو په لګښت یو باب دیني مدرسه پرانیستل شوه
د میدان وردګ ولایت سید آباد ولسوالۍ په تنګيدره کې «د تعلیم القرآن دیني مدرسه» چې د ځايي خلکو په مالي ملاتړ د ۹.۵ مېلیونه افغانیو په لګښت جوړه شوې وه، د سیمې د ګڼشمېر چارواکو، دینيعلماءکرامو او د خلکو استازو په حضور کې د پوهنې وزیر محترم الحاج مولوي حبیب الله آغا له لوري په رسمي ډول افتتاح او ګټې اخیستنې ته وسپارل شوه.
د پوهنې محترم وزیر له ځایي خلکو څخه د قدردانۍ ترڅنګ، په ټولنه کې د علم او پوهې پر اهمیت خبرې وکړې او زیاته یې کړه: پوهنې وزارت په ټول هېواد کې د پوهنیز نظام متوازن پرمختګ او پراختیا ته په قوي هوډ سره ژمن دی.
همدارنګه نوموړي ژمنه وکړه چې د دغې مدرسې لپاره به رسمي بستونه هم په پام کې ونیول شي.
د میدانوردګ ولایت پوهنې رئیس محترم مولوي محمد عثمان حریت په وینا: یاده دیني مدرسه په اساسي ډول په ۲ پوړونو کې جوړه شوې، چې له ټولو اړینو اسانتیاوو سره ۱۲ درسي خونې لري او په پایله کې یې د طلابو لپاره مناسب او معیاري تعلیمي چاپېریال برابر شو.
