لغمان ولایت کې د ۹ بابه ښوونځیو بیارغونه د څه باندې ۱۹ مېلیونه افغانیو په لګښت بشپړه شوه
د لغمان ولایت پوهنې ریاست مسئولین وایي، په دې وروستیو کې د یاد ولایت د دولتشاه، قرغهیي، الیشنګ ولسوالیو او مهترلام ښار په اړوندو کې (۹) بابه ښوونځي د پوهنې یوه همکار بنسټ په ملاتړ، د ۱۹ مېلیونه ۳۷۸ زره۹۳۷ افغانیو په مجموعي لګښت ترمیم او بیارغول شوي دي، چې د یاد ولایت د مقاماتو او د پوهنې ریاست مسئولینو په حضور کې د ځانګړو مراسمو له لارې بیاځلې ګټې اخیستنې ته وسپارل شول.
د یاد ولایت پوهنې رئیس محترم مولوي شاهجهان ساجد، د دغو مراسمو د پرانیستې په مراسمو کې د لغمان والي، د همکار بنسټ مسئولینو او د محفل ګډونوالو ته د ښه راغلاست ترڅنګ وویل، چې په دولتشاه ولسوالۍ کې ۲ بابه، په الیشنګ ولسوالۍ کې ۲ بابه، د مهترلام په ښار کې یو باب، په قرغهیي ولسوالۍ کې یو باب او ۳ بابه نور ښوونځي چې ټولټال نهه (۹) بابه کېږي، ترمیم شوي دي.
