د ننگرهار ولایت دڅوارلسمو ټولګیو فارغو ښوونکو ته د لوړو زده کړو زمینه برابره شوه
د پوهنې وزارت_ننګرهار: د ننگرهار ولایت د پوهنې ریاست اړوند دڅوارلسمو ټولګیو فارغو ښوونکو ته د لوړو زده کړو زمینه برابره شوه.
په هغه غونډه کې چې په همدې موخه د پوهنې په ریاست کې جوړه شوي وه ، د ننګرهار پوهنتون او پوهنې ریاست د مشرتابه تر منځه پر ځینو تخنیکي مسایلو ګډ بحث او د نظر تبادله وشوه.
د پوهنې ریاست د انسجام او همغږۍ امر هجرت الله بهیر په خپلو خبرو کې دلوړو زده کړو وزارت او ننګرهار پوهنتون له مشرتابه څخه مننه وکړه چې د څوارلسمو ټولګیو فارغو ښوونکو ته یې د لیسانس تر کچې د لوړو زده کړو تر سره کولو زمینه برابره کړه. هغه وویل پوهنې ریاست ژمن دی چې ډیر ژر به د دغو ښوونکو ټول معلومات له ننګرهار پوهنتون سره شریک کړي.
د ننګرهار پوهنتون په استازیتوب د ښوونی او روزنې پوهنځي ریس پوهنوال کریم الله په خپلو خبرو کې وویل د لوړو زده کړو وزارت د رهبرۍ دلارښوونې سره سم د ننګرهار پوهنتون ښوونې او روزنې پوهنځی مکلف دی چې د څوارلسمو ټولګیو فارغو ښوونکو ته د لسانس تر کچې د لوړو زده کړو زمینه برابره کړي.پوهنوال کریم الله وویل کوم ښوونکي چې جلال اباد ښار ته نږدې وي هغوې به له رسمي وخت وروسته په عادي ډول خپلو زده کړو ته راځي او هغوې چې په لرې پرتو سیمو کې استوګن دي دژمې او اوړي ددرې میاشتنیو رخصتیو پر مهال به ورته دزده کړو اسانتیا برابریږي.
دنوموړي د معلوماتو له مخې به ټول ښوونکي د هغوې د رشتو پر اساس (ریاضي،فزیک،کیمیا،بیولوژي، پښتو او دري ادبیات،اسلامي زده کړو، انګلیسي،تاریخ او جغرافیه) څانګو کې جذب شي.
