د هرات د پوهنې ریاست او لیان امیري بنسټ تر منځ هوکړه لیک لاسلیک شو
د پوهنې وزارت، هرات: د ښوونځي د درسي مضامينو د ثبت او ایډیټ په موخه د هرات ولایت د پوهنې ریاست او لیان امیري بنسټ لخوا هوکړه لیک لاسلیک شو .
د یاد هوکړه لیک په اساس به د ښوونځي پاتې مضامین (له لومړي څخه تر دولسم ټولګي) به د لیان امیري بنسټ په مرسته ثبت او ایډیټ شي او د ارزښتناکه آرشیف په توګه به د پوهنې ریاست په واک کې ورکړل شي .
د هرات د پوهنې رییس زکریا رحیمي په ټلویزیون کې د ښوونځیو د درسي مضامینو ثبتول د بریښنايي نصاب په رامنځته کولو کې یو مهم ګام وګڼه او د لیان امیري بنسټ څخه یې د هرات له پوهنې ریاست سره د دوامدارو همکاریو له امله مننه وکړه.
د دې هوکړه لیک پر اساس به پاتې درسي مضامین د دوه میاشتو په موده کې د پوهنې ریاست د تکړه ښوونکو لخوا تدریس او ثبت شي.
د یادونې وړ ده چې د قرنطین مودې په جریان کې د ښوونځي د درسي مضامینو لویه برخه د هرات ولایت د پوهنې ریاست لخوا په ټلویزیون کې ثبت شوي او د شپاړس محلي ټلویزیونونو لخوا زده کونکو ته وړیا نشر شوي.
