تخار ولایت کې د نجونو دوو ښوونځيو ته نوې ودانۍ جوړې او ګټې اخیستنې ته وسپارل شوې
پوهنې وزارت، تخار: د تخار ولایت مرکز تالقان ښار کې، د لومړي نمبر او بي بي مریم د نجونو ښوونځیو ته نوې ودانۍ جوړې او د یو لړ مراسمو په ترڅ کې د تخار والي مولوي عبدالله قرلق ، د پوهنې رئیس عبدالسمیع ابدیار، د دولتي ادارو یو شمیر چارواکو، د زده کونکو والدینو او د پوهنې ریاست د شمیر کارکوونکو په ګډون پرانستل شوې.
د یادو شويو ښوونځيو ودانۍ د پوهنې وزارت له پراختیايي بودیجې څخه د ۱۶۷ میلیونه افغانیو په مجموعي لګښت جوړې شوې دي، د بي بي مریم ليسې ودانۍ دوه پوړیزه ده، چې ۳۹ ټولګې ، ۹ اداري خونې، د احاطې دیوال، لس غرفي تشنابونه، د زده کوونکو او ادارې لپاره میزونه او چوکۍ، د واټونو فرش او کانکریت، د والیبال میدان، د اوبو ذخیره او نورې اړینې ښوونیزې آسانتیاوې لري.
همدارنګه ، د تالقان ښار د لومړي نمبر ښوونځي ودانۍ د دوو تعمیرونو په درلودلو سره ۲۶ ټولګي، ۶ اداري خونې ، د احاطې دیوال ، ۱۰غرفې تشنابونه ، د اوبو ذخیره ، د فوټبال میدان ، د زده کوونکو او ادارې لپار میزونه او چوکۍ او نورې ښوونیزې آسانتیاوې لري، چې د یادو دانیو په جوړولو سره، زده کونکو ته خوندي ښوونیز چاپیریال برابر شو.
د یادونې وړ ده، چې دا ودانۍ په تخار ولایت کې د معياري تعلیمي ودانیو له ډلې څخه دي چې د لومړي ځل لپاره په دې ولایت کې جوړې شوې دي.
