د ليريو پرتو سيمو ښوونځیو ته پاملرنه د پوهنې وزارت له لومړيتوبونو څخه دى
پوهنې وزارت، قندهار: د پوهنې وزارت سرپرستې آغلې رنګينې حميدي قندهار ته د خپل سفر په ترڅ کې دا ځل د دې ولايت له ښوونځيو ليدنه وکړه.
په دې ليدنو کې چې د قندهار پوهنې رئيس ښاغلي محب الله روشان هم حضور درلود، میرمن حمیدي د ښوونځيو له زده کوونکو يې غوښتنه وکړه څو خپل درسونه ووايي ځکه چې موخو ته د رسيدو يوازينۍ لاره زده کړې کول دي او په ټول ځواک سره د ستونزو پر وړاندې ودريږي او په نړيواله سطح يوه ښه الګو شي.
په دې ترڅ کې آغلې حميدي زده کوونکو ته وويل: زه نن د يوې وزيرې په توګه نه، بلکې د معنوي مور په توګه تاسو نه پوښتم او غواړم چې خپلې ستونزې له هر ډول ډار پرته ما سره شريکې کړئ.
همداراز د پوهنې وزارت سرپرستې د ښوونځيو له ښوونکو وغوښتل څو د ماشومانو د ښوونې او روزنې برخه کې ډيرې هڅې وکړي.
د آغلې حميدي په وينا دا د پوهنې وزارت دنده ده څو د افغانستان ماشومان او تنکي ځوانان د ښوونې او روزنې له اړخه په نړيوالو معيارونو برابر وروزي او ودې او پرمتخګ خوندي چاپيريال ورته برابر کړي څو په راتلونکي کې علمي غښتلي کادرونه و اوسي.
آغلې حميدي د ښوونځيو د ښوونکو ستونزې واوريدې او د يادو ښوونځيو د ستونزو د حل لپاره يې د پوهنې رياست ته اړينې سپارښتنې وکړئ.
ميرمن حميدي زياته کړه: د نن ورځې ماشومان د سبا ورځې جوړونکي دي او د هغوى د تعليم برخه کې بايد ډيره پاملرنه و شي، نوموړې زياته کړه، تعليم په ښځې او نارينه فرض دى، او د زده کوونکو کورنۍ بايد په دې برخه کې له پوهنې وزارت سره همکاري وکړي او خپلې لورګانې ښوونځيو ته وليږي.
د دې ښوونځيو ښوونکو او زده کوونکو د پوهنې وزارت د سرپرستې راتګ بدرګه کړ، او وې ويل،دا لومړى ځل دى چې د پوهنې وزارت مشرتابه په مستقيم ډول د دې ولايت د ناامنه سيمو له ښوونځيو ليدنه کوي او ستونزې يې بررسي کوي، دوى زياته کړه، د پوهنې وزارت سرپرستې راتګ دا خبره په ډاګه کړه چې اوس د زده کوونکو او د وزارت د رهبرۍ ترمينځ واټن له مينځه تللى.
