د پوهنې وزارت سرپرستې د ترکیې هیواد له سفیر سره کتنه وکړه
د پوهنې وزارت، کابل: د پوهنې وزارت سرپرستې میرمن رنګینې حمیدي، ښاغلي جیهاد ارګین آی د ترکیې هیواد سفیر، ښاغلي صالح ساگر د ترکیې ښوونې او روزنې بنسټ رییس، ښاغلي جنگیز آیدمیر د ترکیې سفارت تعلیمي مشاور او ښاغلي صهیبالرحمن غفاری، د ترکیې د پوهنې بنسټ د دفتر رییس سره په خپل کاري دفتر کې وکتل.
په پیل کې د پوهنې وزارت سرپرستې ښاغلي ارګین آی ته په افغانستان کې د ترکیې هیواد د سفیر په توګه د ګمارنې مبارکي ويلو ترڅنګ د پوهنیز سیستم د پیاوړتیا، د ښوونکو ظرفیت لوړونې، په لرې پرتو سیمو کې د باکیفیته تعلیمي خدمتونو وړاندې کول او ځینې نورو مواردو په تړاو خبرې اترې وکړې.
وروسته ښاغلي ارګین آی د پوهنې او روزنې برخه کې د ترکیې هیواد د مرستو دوام په تړاو ډاډ ورکړ او زیاته یې کړه چې د خپل کاري ماموریت په موده کې به د پوهنې له نظام څخه په کلکه ملاتړ وکړي.
د پوهنې وزارت سرپرستې د دوست هیواد ترکیې له دایمي مرستو په مننې زیاته کړه معارف غیر سیاسي بنسټ دی او د شایسته سالاري اصل ته پام، د دې وزارت له لومړیتوبونو نه شمېرل کیږي.
هغې زیاته کړه باکیفیته تعلیمي خدمتونو ته متوازن لاسرسی د پوهنې وزارت له اصلي موخو څخه شمېرل کیږي او د ترکیې هیواد کولی شي دې برخه کې، او ترڅنګ یې افغان زده کوونکو په ځانګړي ډول انجونو ته د تحصیلي بورسیو په ورکولو کې د افغانستان د معارف لاس نیوی وکړي.
