په لوګر کې د ۳ دارالأیتامونو له ۱۳۶ یتیمو زده کوونکو سره مرسته وشوه
په لوګر ولایت کې د ۳ دارالأیتامونو له ۱۳۶ یتیمو زده کوونکو سره د درسي توکو،خولیو، کورتیو،بوټانو او جورابو مرسته وشوه.
د یادې مرستې د وېشلو په مراسمو کې، چې د محمدي دارالعلوم په انګړ کې جوړه شوې وه د پوهنې رئیس مولوي جنت ګل عزیز،د مالي او اداري چارو مرستیال محمد عارف معاذ، د اسلامي زده کړو مرستیال صدیق الله عزیزي، د اومه خیریه بنسټ استازو اقبال روات او محمد ادریس برخه اخیستې وه.
دا مرسته د پوهنې ریاست په هلو ځلو، د اومه په نوم یوه خیریه بنسټ له خوا وشوه، چې شااوخوا ۲۷۲ زره افغانۍ ارزښت لري.
په دې مرسته کې، هر یتیم زده کوونکي ته د کتابونو یو بیک، ۶ ټوکه کتابچې، ۱۲ قلمونه، ۱۲ پنسلونه، یو پرکال، ۳ پنسل تراشونه، ۳ پنسل پاکونه، یو خط کش، یوه کورتۍ، یوه خولۍ، یوه جوړه جورابې او یوه جوړه بوټ ورکړل شول.
د لوګر د پوهنې رئیس ښاغلی مولوي جنت ګل عزیز د یادې مرستې د وېش پر مهال د اومه خیریه بنسټ له دې مرستې مننه او د دوام غوښتنه یې وکړه.
هاخوا د یاد خیریه بنسټ استازو ژمنه وکړه، چې دوی په راتلونکي کې د پاتې دارالأیتامونو له یتیمو زده کوونکو سره دا ډول نورې مرستې هم کوي.
هغوى زياته کړه، چې ټوله اسلامي نړۍ د يتيمانو په روزنه او پالنه کې مسٶل دي او بايد په اسلامي مسٶليت سره خپله دا مهمه دنده سرته ورسوي او هم دوى د افغانستان له مسلمان ملت څخه خپل ملاتړ څرګند کړ.
