د پوهنې وزارت داسلامي تعلیماتو معین د امام ابوحنیفه (رحمه الله) په عالي دارالعلوم کې د سیرت النبي(صلی الله علیه وسلم) له سیالۍ څخه لیدنه وکړه
د پوهنې وزارت د اسلامي تعلیماتو معین الحاج مولوي کرامت الله اخندزاده، د امام ابوحنیفه (رحمه الله) په عالي دارالعلوم کې د سیرت النبي(صلی الله علیه وسلم) له سیالۍ څخه لیدنه وکړه.
یاده سیالۍ د پوهنې وزارت د دارالعلومونو ریاست تر اشراف لاندې د یاد دارالعلوم د مسئولینو او استادانو په اهتمام د لسم، یوولسم او دولسم ټولګیو د زده کوونکو لپاره د تحریري ازموینې په بڼه تنظیم شوې وه او په نږدې راتلونکې کې به یې پایلې اعلان شي.
د اسلامي تعلیماتو معین د یادې سیالۍ له صحنې څخه د لیدنې په مهال د سیالۍ له تنظیموونکو او ګډون کوونکو څخه مننه وکړه او دا ډول علمي سیالۍ یې په ټولنه کې د اسلامي زده کړو د عامولو او د رسول الله(صلی الله علیه وسلم) له سیرت سره د آشنايي د پیدا کېدلو په برخه کې خورا اړینې وبللې او زیاته یې کړه چې یادې سیالۍ به په راتلونکې کې هم د مرکز او ولایاتو په کچه دوام ولري.
د یادونې وړ ده، چې یاده سیالۍ دکابل په عربي دارالعلوم کې هم ترسره شوه.
