په غزني ولایت کې یو ښوونځی ګټې اخیستنې ته وسپارل شو
د غزني ولايت د اندړو ولسوالۍ د ګدام درانو په کلي کې یو ښوونځی د يو لړ مراسمو په ترڅ کې جوړ او ګټې اخیستنې ته وسپارل شو.
په دې مراسمو کې د ولایت د مرستیال والي سربېره د پوهنې ریاست سرپرست رئیس، د ناروې د کمیټې استازو، علماوو، مخورو قومي شخصیتونو، د یو شمیر زده کوونکو والدینو او د خلکو استازو ګډون کړی وو.
مراسم د سپیڅلي کلام د مبارکو آیاتونو په تلاوت سره پیل شو.
په پيل کې د دغه ولايت د پوهنې رياست سرپرست رئیس راغلو مېلمنو ته ښه راغلاست ووايه او څرګنده يې کړه چې ياد شوى ښوونځى په پنځه جريبه ځمکه کې په يو پوړ کې جوړ شوى. د ښوونکو لپاره یوه اداره او شپږ درسي خونې لري چې د ۵۰۰ تنو زده کونکو د ځایدلو ظرفیت لري.
نوموړي دغه راز د دې ښوونځي د جوړېدا په برخه کې د ناروې له کمېټې او د دې کلیو د خواخوږو شخصیتونو له مرستو څخه مننه وکړه او په نورو برخو کې يې د خپلو ښوونيزو مرستو د دوام غوښتنه وکړه.
ورپسې د غزني مرستيال والي قاري ګل حيدر شفق وويل: کله چې د يوه ښوونځي دروازه پرانیستل کیږي، نو د جهالت دروازې تړل کېږي او ژمنه يې وکړه چې د غزني والي به د پوهنې رياست د پروګرامونو ملاتړ کوي. "
د ناروې د انجینرۍ د کمیټې د مشر په وینا، پر دې ښوونځي ټولټال ۲۶ زره ډالره لګښت راغلی، چې ۱۰۰۰ ډالره یې د خلکو له مرستو څخه دي.
