د لغمان له پوهنې ریاست څخه خبرونه
په علیشنګ ولسوالۍ کې د احمد خان د لومړني ښوونځي د بنسټ ډبره کېښودل شوه.
د يادونې ده، چې ياد ښوونځى څلور درسي ټولګي، يوه اداري خونه، دوه تشنابونه او د څښاک د اوبو يوه څاه لري، چې په دوه جريبه ځمکه کې د مير افغان صافي د دوه میلیونه افغانیو په شخصي لګښت جوړیږي.
د پوهنې ریاست د نوموړي د ښه احساس ستاینه وکړه او له نورو یې وغوښتل چې د پوهنې په برخه کې ورسره مرستې وکړي.
په لغمان ولایت کې د چندال له مدرسې څخه ۳۶ تنه د قرآن کریم د څارنې له دورې څخه او ۳۳ تنه د تعلیم القران محمدیه له مدرسې څخه فارغ شول. په هغه غونډه کې چې په همدې موخه جوړه شوې وه د پوهنې ریاست مشرتابه، ښوونکو، زده کوونکو، علماوو او د فارغانو کورنیو ګډون کړی وو.
د دغه ولایت د پوهنې رئیس مولوي شاه جهان ساجد فارغانو ته د مبارکۍ ویلو ترڅنګ له هغوی وغوښتل، چې خپلې علمي لاسته راوړنې له راتلونکي نسل سره شریک کړي او د ولس او ټولنې په خدمت کې له هیڅ ډول هڅو ډډه ونه کړي.
د سویډن کمېټې او د لغمان ولایت د پوهنې ریاست ګډ پلاوي په دغه ولایت کې د یادې موسسې په ملاتړ د چنچارپل د لومړني ښوونځي له ښوونیزو او اداري فعالیتونو او د سیمه ییزو او چټکو زده کړو له ټولګیو څخه لیدنه وکړه.
یاد پلاوي د يادو ادارو د زده کوونکو ستونزي يې واوريدې او د حل په برخه کي يې د مسوولينو سره د مرستو ژمنه وکړه.
په پای کې پر ممتازو زده کوونکو ښوونیز مواد هم ووېشل شول.
د الینګار ولسوالۍ د پوهنې آمریت د دې ولسوالۍ د ښوونځیو له آمرینو او مدیرانو سره ناسته وکړه او د ښوونیز بهیر د ښه والي او په دې برخه کې یې د شته ننګونو د حل په باب ورسره خبرې وکړې.
د لغمان ولایت د الیشنګ ولسوالۍ د تعلیمي څارنې غړو د میا عبدالکریم او احمدخان لېسو له تدریسي چارو څخه څارنه وکړه او د دغو ښوونځیو له فعالیتونو څخه یې خوښي وښوده.
