د کابل له پوهنې ریاست څخه خبرونه
د کابل ولایت د استالف ولسوالۍ په حصارخیلو کلي کې یوه سیمه ییزه مدرسه جوړه شوه. دغه دیني مدرسه درې درسي خونې لري.
د دې مدرسې د پرانېستلو په مراسمو کې دیني عالمانو، د پوهنې مسوولینو او د خلکو استازو ګډون کړی وو.
علماوو او ويناوالو د ټولنې په اصلاح کې د دیني علومو پر ارزښت ویناوې وکړې او له خلکو يې وغوښتل چې خپل اولادونه مدارسو ته واستوي.
د قرباغ ولسوالۍ د پوهنې آمر د دې ولسوالۍ له مشرانو او د ښوونځيو د شورا له غړو سره په جوړه شوې غونډه کې د قرباغ د پوهنې پر اداري او تدريسي مسايلو خبرې وکړې او له ګډونوالو يې وغوښتل، چې له پوهنې سره په ټولو برخو کې مرستې وکړي، ځکه د هیواد د پرمختګ یوازینۍ لاره ښوونه او د هیواد د ماشومانو سالمه روزنه ده.
د ماشوم ساتنې موسسې د کابل ولایت د فرزه ولسوالۍ د ښوونځیو د شوراګانو لپاره دوه ورځنی ورکشاپ جوړ کړ.
د فرزه ولسوالۍ د پوهنې آمر د علم او پوهې پر ارزښت خبرې وکړې او له ګډونوالو یې وغوښتل چې خپل ماشومان د علم او پوهې په ګاڼه سمبال کړي.
کاناډا موسسه د کابل ولایت د میربچه کوټ او کلکان ولسوالیو د پوهنې آمریت د کارکوونکو لپاره د ظرفیت لوړونې سیمینار جوړ کړ او د یادو دوو ولسوالیو د ښوونځیو زده کوونکو ته یې کتابچې، قلمونه، لاسي بکسې او نور اړین توکي هم ورکړل.
د دواړو ولسوالیو د پوهنې آمریتونو د یادې ادارې له مرستو څخه مننه وکړه او د نورو مرستو د دوام غوښتنه یې وکړه.
د ګلدرې ولسوالۍ د شاه میر لېسې شورا د قومونو او د دې ولسوالۍ د پوهنې د آمر په حضور کې جوړه شوه او د نوي ښوونیز کال د چمتووالي، د کاري پلانونو د ترتیب او په دې ښوونځیو کې د شته ستونزو په باب بحث او لازمې پرېکړې وشوې.
