د پوهنې وزارت سرپرست د هېواد سویلي ولایتونو ته د خپلو سفرونو په ترڅ کې پکتیکا ولایت ته ولاړ
د پوهنې وزارت سرپرست الحاج مولوي حبیب الله آغا، د هېواد د سویلي ولایتونو ښوونیز وضعیت ارزونې او د پوهنې مسئولینو، علماوو او قومي مخورو سره د لیدنې په موخه، نن پکتیکا ولایت ته ورسېد.
د پوهنې وزارت سرپرست، په هغه غونډه کې چې د پکتیکا ولایت له پوهنې رئیس مولوي عبدالوکیل خالد، رهبرۍ، د علماوو شورا رئیس شیخ عبدالقدوس اعظمي، مسئولینو او کارکوونکو سره درلوده، د ديني او عصري علومو د پياوړتيا او پراختیا په برخه کې یې د یاد وزارت د پرمختيايي پروګرامونو او د هېواد بچیانو لپاره د ښوونې او روزنې د آسانتياوو په باب تفصیلي خبرې وکړې.
نوموړي وویل، چې د افغانستان .ا.ا. په حاکمیت سره، د علم پروره خلکو، ملي سوداګرو او مرسته کوونکو بنسټونو په مالي مرسته، په ټول هېواد کې په سلګونو بابه ښوونځي جوړ شوي دي او زیاته یې کړه، د پوهنې د پراختیا او معياري کولو لپاره به له هېڅ راز هلوځلو څخه درېغ ونه کړي.
ورپسې د پکتیکا پوهنې رئیس او یو شمېر علماء کرامو د پوهنې وزارت سرپرست ته ښه راغلاست ووایه او زیاته یې کړه، له دې سربېره چې پوهنې وزارت مشرتابه د خپلو زیاتو وظیفوي مصرفیتونو سره سره، دغه ولایت ته سفر وکړ؛ ترې مننه او قدرداني کوي.
په ورته مهال، د یاد ولايت د علماوو شورا رئیس د مسلکي ښوونکو د کمښت، د یو شمېر ښوونځيو لپاره د ودانیو نشتون، د علي بابا مرکزي لېسې اړوند ستونزې، متوسطې او لېسې ته د یو شمېر ښوونځيو ارتقاء ورکولو موضوع او د پوهنې رياست د اداري او تدريسي تشکيلاتو د زياتوالي په ګډون يو شمېر ښوونيزې او روزنيزې ستونزې مطرح او د پوهنې وزارت له رهبرۍ څخه يې وغوښتل، چې د يادو ستونزو د حل په برخه کې دې اړوندو مسئولينو ته لازمې سپارښتنې وکړي.
همدارنګه د پوهنې وزارت سرپرست ژمنه وکړه، چې د یاد وزارت په تشکیلاتي جوړښت کې د اړتیا وړ بستونو په زیاتوالي سره به د دغه ولایت پوهنې ریاست ته لومړیتوب ورکړل شي.
د پوهنې وزارت سرپرست او ورسره مل پلاوي د پکتیکا ولایت په مرکز ښرنه کې، د حضرت بلال (رضی الله عنه) نمونوي لېسې په ګډون له یو شمېر مدارسو او ښوونځیو څخه لیدنه وکړه؛ له مسئولینو، ښوونکو او زده کوونکو سره یې له نیږدې وکتل او د ستونزو د ارزونې ترڅنګ يې، هغوی خپلو اساسي مسئوليتونو ته متوجې کړل.
