د پوهنې وزارت د دعوت او ارشاد ریاست د ۱۴۰۳ لمریز کال لړم میاشتې ولایتي سفرونو راپور
د پوهنې وزارت د دعوت او ارشاد رئیس الحاج مولوي جمعه خان"سروري" او ورسره مل پلاوي د لړم میاشتې له لومړۍ تر ۲۶ مې نېټې د هېواد ۹ شمالي( بغلان، کندز، تخار، بدخشان، بلخ، جوزجان، سرپل، فاریاب او سمنگان ) ولایتونو ته رسمي سفرونه وکړل. پلاوي د خپلونو سفرونو اساسي موخه، د تعلیمي ادارو لپاره د مبلغینو پېژندنه، د چارو څارنه، د اداري دندو کتنه، د دعوت ارشاد د نصاب تدریس او د یو شمېر ستونزو حل وباله. د پوهنې وزارت د دعوت او ارشاد رئیس د همدغو ولایتونو د پوهنې مرکزي ریاستونو او ساحوي آمریتونو له مسئولینو او منسوبینو سره په هر ولایت کې درې غونډې وکړې او له یوشمېر رسمي او خصوصي ښونځيو ځخه یې د لیدنې په ترڅ کې، د ښوونکو او زده کوونکو پوهنیز وضعیت وارزاوه. دغه راز نوموړي دولایتونو د پوهنې رئیسانو مخلصانه هڅې هم وستایلې او د مسئولینو په مرسته یې په دغو نهو ولایتونو کې مبلغین وګمارل، چې په ټوله کې یې تعداد ( ۲۴۵۵ ) تنو ته رسېږي. همدارنګه د دعوت او ارشاد رئیس څرګنده کړه، چې یاد مبلغین د خپلې رسمي دندې ترڅنگ د دعوت مقدسه پروسه هم پر مخ وړي. په دغه سفر کې نوموړي د پوهنې کارکونکو ته وویل، چې خپلې ورځنۍ چارې د الله جل جلاله د رضا حاصلولو په خاطر په پوره صداقت او اېماندارۍ ترسره، په اداراتو کې د خپلولۍ پاللو پر ځای د وړتیا او استعدادونو په اساس گمارنه، ادارو کې د مراجعینو سره ښه او نېک سلوک، حق حقدار ته په سپارلو، خپل صورت او سیرت د رسول الله صلی الله علیه وسلم په سنتو برابر او خپل ټول اعمال د شریعت په چوکاټ کې تنظیم او پلي کړي. د یادو سفرونو لړۍ د لړم میاشتې په ۲۶ مه نېټه پای ته ورسېده.
