د پوهنې وزارت کارکوونکو لپاره لارښود او روزنیز سیمینار پرانیستل شو
د پوهنې وزارت د دعوت او ارشاد ریاست له خوا، د یاد وزارت د مرکزي هستې منسوبینو او غړو لپاره لارښود او روزنیز سیمینار ترسره شو.
د یاد پروګرام د پرانیستې په مراسمو کې، د پوهنې وزارت د سرچینو - ادارې او کیفیت تضمین محترمو معینانو، د یاد وزارت چارواکو، کارکوونکو، د افغانستان .ا.ا. د چارو ادارې لوی رئیس محترم شیخ نورالحق انور، د امربالمعروف نهی عن المنکر او شکایتونو اوریدلو وزارت د دعوت او ارشاد لوی رئیس محترم قاري شریف الله حقاني او د کابل ولایت د علماوو شورا مرستیال محترم شیخ خلیفه صاحب محب الله هم حضور درلود.
په پیل کې د پوهنې وزارت د کیفیت تضمین محترم معین مېلمنو او ګډونوالو ته د ښه راغلاست ترڅنګ، د سیمینار د موضوعاتو او منځپانګې په اړه معلومات وړاندې کړل او له منسوبینو یې وغوښتل چې له مراجعینو سره لاښه چلند ترسره او ژر تر ژره دې په ټاکلي وخت سره د هغوی ستونزو ته رسېدنه وکړي.
ورپسې د افغانستان.ا.ا. د چارو ادارې لوی رئیس هم د خبرو پر مهال، په ټولنه کې د تعصباتو د منفي اغېزو په اړه په مفصلې خبرې وکړې او ویې ویل: د ژبني، سمتي، قومي او نورو تعصباتو مخنیوی او له هغوی څخه د خلاصون یوازینۍ لاره، په بشپړه ډول د اسلام مبارک دین په دایره کې شاملېدل دي او ټینګار یې وکړ چې د دولتي ادارو منسوبین باید د ټولنې له ټولو افرادو او برخو سره په متوازن او مخلصانه ډول چلند وکړئ.
د یادې علمي غونډې نورو ویناوالو هم د ټولنې د اصلاح او هېواد د پرمختګ لپاره د امربالمعروف او نهی عن المنکر د ګټو او اغېزو په اړه خبرې وکړې او څرګنده یې کړه: د نېکو اعمالو د پلي کولو امر کول او د نامناسبو او ناروا کړنو منع کول نه یوازې د حکومتونو دنده ده، بلکې د هر مسلمان دنده او مسئولیت دی، تر څو د خپلې ټولنې او خلکو په وړاندې باید په زړورتیا سره په دغه مقدسه لاره کې هلې ځلې وکړي.
دغه لارښود او روزنیز سیمینار د پوهنې وزارت د ولایتي چارو د انسجام او همغږۍ د رئیس محترم مولوي صاحب پاینده محمد تعلیم له لوري د خیر او فلاح مبارکې دعائیې په لوستلو سره پای ته ورسېد.
