د دایکنډي ولایت د اداري مدیریت لاښهوالي لپاره د ۳۸۳۵ تنو ښوونکو د اسنادو او سوابقو برېښنایي کډ جوړ شو
د دایکنډي ولایت پوهنې ریاست خبر ورکوي چې د ۳۸۳۵ تنو ښوونکو د اسنادو او سوابقو برېښنایي کډ کولو له لارې یې د اداري چارو د اسانتیا او د اسنادو د خرابېدو او ضایع کېدو مخنیوي لپاره یو مهم ګام پورته کړی دی.
د ترلاسه شویو معلوماتو له مخې، دا پروسه، چې د یادې ادارې د ګمارنې مدیریت د سوابقو څانګې لخوا پیل شوې وه، د دوه نیمو میاشتو دوامداره کار وروسته بشپړه شوه.
په دې نوي سیسټم کې، د هر ښوونکي لپاره ځانګړي کډونه تعریف شوي او معلومات د ولسوالیو له مخې په برېښنایی ډیټابیس کې ذخیره شوي دي.
د پوهنې ولایتي مسئولین وایي چې له دغه اقدام څخه یې اساسي موخه اداري نوښت، معلوماتو ته چټک لاسرسی، د انساني غلطیو کمول او د ښوونکو د فایلونو په مدیریت کې د روڼتیا زیاتوالی دی.
د یادولو وړ ده چې همدغه اقدام د پوهنې وزارت د جامع پروګرامونو یوه برخه ده، چې د بشري سرچینو مدیریت سیسټم عصري کولو او اداري خدماتو کیفیت لوړولو کې مهم نقش لري او تمه کېږي چې دا پلان به د ښوونکو د اسنادو د مدیریت په برخه کې ننګونې د پام وړ کچې ته راکمې کړي.
