د پوهنې وزارت د دعوت او ارشاد محترم رئیس کندز ولایت ته رسمي سفر وکړ
د پوهنې وزارت د دعوت او ارشاد رئیس محترم الحاج مولوي جمعه خان "سروري" کندز ولایت ته د خپل رسمي سفر په ترڅ کې، د یاد ولایت له پوهنې رئیس محترم الحاج مولوي حزبالله مبشر او کارکوونکو سره ځانګړې غونډه ترسره کړه.
د دعوت او ارشاد محترم رئیس په یاده غونډه کې د پوهنې ریاست له کارکوونکو وغوښتل چې د خپلو دندو ترسره کولو ترڅنګ، خپل سیرت، صورت او چلند د نبوي سنتو او اسلامي اخلاقو سره سم برابر کړئ.
نوموړي زیاته کړه چې ښوونکي او د پوهنې کارکوونکي د سالمې ټولنې جوړولو بنسټونه دي او باید د خپلو کړنو له لارې د نورو لپاره د ښه سلوک او رښتینولۍ بېلګه وګرځئ.
د کندز ولایت پوهنې محترم رئیس هم د غونډې پر مهال د پوهنې وزارت له مشرتابه څخه د مننې سربېره ژمنه وکړه چې د یاد ریاست کارکوونکي به د اصلاح، نظم او همغږۍ په فضا کې خپلې دندې پرمخ وړي.
غونډه د مبارکې دعائیې په لوستلو سره پای ته ورسېده.
