په جوزجان ولايت کې یو باب ښوونځی پرانیستل شو
د جوزجان ولایت خواجه دوکوه ولسوالۍ اړوند په چوغان کلي کې، یو باب لومړنی ښوونځی د یو لړ مراسمو په ترڅ کې د پوهنې رئیس، علماوو، قومي مخورو او د سیمې د خلکو په ګډون پرانیستل شو.
د یاد ولايت پوهنې رئیس الحاج مولوي محمدطاهر جواد وويل : د دغه کلي ماشومان په تېرو شلو کلونو کې زده کړو ته لاس رسى نه درلود او د نوي ښوونځي په تاسیس سره ١٧٠ تنه ماشومانو ته د زده کړو آسانتیا برابره او د سواد له نعمت څخه برخمن شول.
د جوزجان د پوهنې رئیس ژمنه وکړه، چې ډېر ژر به د ياد ښوونځي لپاره د ودانۍ د جوړېدو چارې پيل کړي.
بل پلو د سيمې اوسېدونکو په خپل کلي کې د ياد ښوونځي پر جوړېدو خوښي څرګنده او په یاده برخه کې يې د پوهنې رياست له پاملرنې مننه او قدرداني وکړه.
