د سید جمالالدین افغان نمونوي لېسه به په نږدې راتلونکي کې پرانیستل شي
د پوهنې وزارت له لوري به ډېر ژر په کابل ښار کې د ممتازو زدهکوونکو لپاره د سید جمالالدین افغان په نوم نوې نمونوي لېسه پرانیستل شي.
یاده لېسه په معیاري زدهکړو او ټولو عصري امکاناتو سره سمباله ده، د هېواد د مرکز په شمول د ټولو لېرې پرتو او محرومو سیمو د مستعدو او ممتازه زدهکوونکو د ښوونې او روزنې لپاره ځانګړې شوې ده، چې د اړوندو سیمو څخه به د اووم، اتم او نهم ټولګیو مستعد زدهکوونکي د یادې لېسې په لسم ټولګي کې جذب کړي.
د پوهنې وزارت چارواکي وايي: دغه لېسه به په ټولو عصري تجهیزاتو سمبال درسي ټولګي، کمپیوټرلب، لابراتوار، کتابتون، مجهزه لیلیه، خوړنځی او ازاد شین چاپېریال ولري، چې تدریسي بهیر به یې د تجربهلرونکو او لوړ علمي کادر استادانو له خوا پر مخ وړل کېږي.
هغوی زیاته کړه چې زدهکوونکو ته به د پوهنیز نصاب تر څنګ د ساینس او اسلامي زدهکړو په برخو کې ځانګړي تدریسي پروګرامونه هم وړاندې شي، ترڅو هغوی د راتلونکي لپاره په لا ښه ډول چمتو شي.
د یادونې وړ ده چې اوسمهال په سیدجمالالدین افغان نمونوي لېسه کې ۲۰۰ تنه زدهکوونکي جذب شوي او تمه ده چې دغه شمېر به ډېر ژر ۶۰۰ تنو ته لوړ شي.
