د پوهنې وزارت د نوي تشکیل د تطبیق په اړه مشورتي ناسته ترسره شوه.
د دندو د لاسوهنې د مخنيوي ، د تشکيلاتي جوړښت د سمون او د پوهنې وزارت دندو په برخه کې اړوندو څانګو د يووالي په موخه، د دغه وزارت د مرکزي او ولايتي څانګو اداري جوړښت، چې د کارپوهانو له هر اړخيزې کتنې وروسته يې ديني مدارسو لپاره یو لک نوي بستونه ترتیب او وروسته يې د افغانستان.ا.ا عالي مقام رهبرۍ ته وړاندې کړي وو، اوس یاد پلان له تصویب وروسته د تطبیق لپاره دغه وزارت ته را استول شوی دی.
په همدې موخه د پوهنې وزارت د سرچينو او اداري چارو معين مولوي صبغت الله وصيل په مشرۍ د ياد پلان د تطبيق په موخه مشورتي غونډه چې د دغه وزارت مسوولينو ،رئيسانو او کارپوهانو پکې ګډون کړى و جوړه شوه.
په پیل کې د سرچينو او ادارې معين د نوي تشکیل د ګټو په اړه خبرې وکړې، د هغې د سم تطبیق او لارو چارو په اړه یې د غونډې له رئیسانو او غړو سره مشورې او نظرونه تبادله کړل.
هغه ټینګار وکړ، چې باید هڅه وشي، څو د پوهنې وزارت او ریاستونو کارکوونکي د دغه پروګرام د تطبیق په بهیر کې خپل مسؤلیتونه له لاسه ورنه کړي.
په پاى کې دغونډې ګډون والو د نوي تشکيل د عملي کولو په لاره کې د شته ننګونو په اړه خپل نظرونه د وزارت له مشرتابه سره شريک کړل.
وروسته پرېکړه وشوه چې د نوي تشکيل د تطبيق پروګرام دې، د ولايتونو د پوهنې له رياستونو څخه پيل او د پوهنې وزارت په مرکزي هسته کې پای ته ورسول شي.
