د پوهنې وزارت د کیفیت تضمین محترم معین د غزني ولایت له پوهنې رئیس او مسئولینو سره وکتل
د پوهنې وزارت د کیفیت تضمین معین محترم الحاج مولوي عبدالخالق صادق، غزني ولایت ته د خپل رسمي سفر په ترڅ کې، د یاد ولایت له پوهنې رئیس محترم الحاج مولوي میر نصیر احمد حسیني او چارواکو سره وکتل.
په دغه غونډه کې، دواړو لوریو د پوهنې اوسني وضعیت، په مرکز او ولسوالیو کې د ښوونیز بهیر، د تعلیمي کیفیت لاښه والي او په تعلیمي سکټور کې د وروستیو مثبتو بدلونونو په اړه په تفصیل سره خبرې وکړې.
دغه راز د پوهنې مسئولینو ترمنځ د ښوونکو مسلکي وړتیا لوړول، د تعلیمي چارو تنظیم، د تعلیمي مرکزونو ستونزې او د کیفیت تضمین میکانیزمونو په تړاو هم خبرې تبادله شوې.
ورپسې د پوهنې وزارت محترم معین د یاد ولایت له والي الحاج ملا عبدالصمد جاوید سره هم وکتل، چې په ترڅ کې یې د پوهنې پیاوړتیا، د تعلیمي ادارو ملاتړ او د اړوندو ادارو ترمنځ د همغږۍ اهمیت په اړه بحث او نظرونه تبادله کړل او په پای کې ولایتي چارواکي د پوهنې پلاوي ته د بشپړ ملاتړ ډاډ ورکړ.
