د پوهنې وزارت سرپرست د کابل ولایت له یو باب دارالعلوم څخه لیدنه وکړه
د پوهنې وزارت سرپرست محترم الحاج مولوي حبیب الله آغا د یو شمېر چارواکو په ملتیا، د کابل ولایت شکردرې ولسوالۍ له حضرت علي (کرم الله وجهه) دارالعلوم څخه لیدنه وکړه.
د پوهنې وزارت سرپرست یاد دارالعلوم ته په رسېدلو سره د استادانو او طلابو لخوا تود هرکلي سره مخامخ شو او ورپسې نوموړي په هغه غونډه کې چې د دارالعلوم د مسئولینو، استادانو او زدهکوونکو سره یې درلوده، د دغه تعلیمي بنسټ د کړنو په اړه لنډ راپور آورېدلو ترڅنګ، د تعلیمي چارو لاښه والي او په اسلامي روحیې سره د هېوادبچیانو د ښوونې او روزنې په اړه د دارالعلوم استادانو او طالبالعلمانو ته یو لړ ګټورې او ارزښتناکې لارښوونې او مشورې هم وړاندې کړې او د وړاندیزونو او ستونزو د حل په برخه کې یې د همکارۍ ژمنه وکړه.
په ورته مهال د پورته ذکر شوي دارالعلوم چارواکو او استادانو، د پوهنې وزارت د مشرتابه له سفر څخه د هرکلي او ښه راغلاست سربېره، د ځوانانو او زدهکوونکو د سالمې ښوونې او روزنې په برخه کې، د یاد وزارت د مشرتابه د پرېکړو او احکامو پلي کولو ډاډ ورکړ.
