د کابل ولایت په پغمان ولسوالۍ کې د ۱۳ مېلیونه افغانیو په ارزښت د یو باب ښوونځي د ودانۍ بنسټ ډبره کېښودل شوه
د کابل ولایت پغمان ولسوالۍ اړوند په پراچي کلي کې د معاذ بن جبل«رضی الله عنه» منځني ښوونځي د ودانۍ بنسټ ډبره، د یاد ولایت د والي مولوي امين الله «عبيد»، پوهنې رئیس مولوي عبدالحق «حقاني»، سیمه ییزو مسئولينو، يو شمېر علماءکرامو اوقومي مخورو په ګډون کېښودل شوه.
پوهنې ریاست مسئولین وايي، د یاد منځني ښوونځي د جوړېدو لپاره د یو همکار بنسټ له لوري ۱۳ مېلیونه افغانۍ ځانګړې شوې دي او په پلان کې ده چې د ښوونځي دغه نوې ودانۍ به له ټولو اړینو ملحقاتو سره ۸ درسي ټولګي ولري.
د کابل ولایت والي او د پوهنې رئیس د خپلو خبرو پر مهال، د هېواد په پرمختګ او د راتلونکو نسلونو د سالمې روزنې په برخه کې د پوهنې پر اهمیت د خبرو ترڅنګ، د هېواد په ټولو برخو کې د پوهنې وزارت د ښوونیزو او روزنیزو بنسټونو د پیاوړتیا په تړاو خلکو ته ډاډ ورکړ.
په ورته مهال يو شمېر علماءکرامو او د سيمې د خلکو استازو هم خبرې وکړې او په ياده ولسوالۍ کې يې د پوهنې وزارت او د کابل ولايت پوهنې رياست د پلانونو له پلي کېدو څخه ملاتړ څرګند کړ.
